حقوق الشوق محفوظة وحدّي ما تعديتــه
على طاري صباح الورد وإسمك والحلا والذوق
ذكرتك يا اجمل أحلامي بقافي واستهليته
على درب القصيد أسوق قلبي والخطاوي شوق
وإذا مالت بي الخطوة على دربك تناسيته
يهز الشوق بأعماقي عناقيد الغرام عذوق
ويقطف بالغلا فيني غرامٍ خنت وأخفيته
أحبك كثر ما يشعل غرامك في حشاي حروق
وشبٌه زود لو يحرق ضلوعي مت مطفيته
أحبك دمعةٍ طاحت على خد الصباح اشروق
يموت النور لو طاحت على كفي وضميته
أحبك إيه أحب إسمك وأموت بجيدك المنتوق
تخيل كثر ما أكره صدودك قمت حبيته
تموت من البطا غيمه طعنها من جفاك بروق
غشى روض الحشا وسمي جفافك وإنت ما ارويته
تعال إجرح على كيفك تربع واستحل عروق
تدلل والبساط أحمد وأنا لرضاك مديته
قم إسهج لآخر ضلوعي تغلغل داخلي برفوق
حلالك ما بقى مني مع اللي لجلك أفنيته
من اللي من غديت أجمل قصيدة ما غدا له ذوق
ومن اللي يكتب باسمك قصيده وانكسر بيته
وربي من كتبت إسمك وبروزته بقلبي فوق
وأنا ما دار في بالي قصيدٍ ما تحاليته
دخيل الدمعتين اللي غدت منها الخدود شقوق
ترفق سامحك ربي على قلبٍ لك أهديته
إذا لك حق في قلبي فأنا لي في غلاك حقوق
حقوق الشوق محفوظة وحدّي ما تعديته
يذكرني صباح الورد وإسمك والحلا والذوق
وأردد يا أجمل أحلامي بقافي يوم هليته
لكم آع‘ذب التح‘آيآ
الموضوع الأصلي :
حقوق الشوق محفوظة وحدّي ما تعديتــه المصدر :
منتدى هواميركول الكاتب: @@سيدة اعمال@@
الرئيسية 
